ភ្លៀងលាយឡំខ្យល់កន្ត្រាក់បានបំផ្លាញលំនៅដ្ឋានពលរដ្ឋជាង ៤០ខ្នងនៅ០២ស្រុកផ្សេងគ្នាក្នុងខេត្តបាត់ដំបង
បាត់ដំបង៖ កាលពីល្ងាចថ្ងៃទី៣០ ខែមីនា ឆ្នាំ២០២២ ភូមិសាស្ត្រមួយចំនួនក្នុងខេត្តបាត់ដំបងមានភ្លៀងធ្លាក់លាយឡំជាមួយខ្យល់កន្ត្រាក់បានបក់បោកបំផ្លាញលំនៅដ្ឋានរបស់ប្រជាពលរដ្ឋអស់ចំនួន ៤៥ខ្នងនៅក្នុងស្រុក ២ផ្សេងគ្នា។
សមត្ថកិច្ចបានអោយដឹងថា ហេតុការណ៍គ្រោះធម្មជាតិខាងលើនេះ ករណីទី១បានកើតឡើងនៅក្នុងឃុំផ្លូវមាស ស្រុករតនមណ្ឌល ដោយបានបំផ្លាញខូចខាតផ្ទះចំនួន ៥ខ្នង និងរបើកដំបូលសង្ក័សីអស់ចំនួន ៤២សន្លឹក និងករណីទី២ ប៉ះពាល់ទៅលើឃុំចំនួន ២ ក្នុងស្រុកថ្មគោល បានបំផ្លាញខូចខាតផ្ទះចំនួន ៤០ខ្នង ដែលក្នុងនោះឃុំជ្រោយស្តៅ របើកដំបូលផ្ទះ ១១ខ្នង និងឃុំបឹងព្រីង របើកដំបូលផ្ទះចំនួន ២៩ខ្នង រោងគោចំនួន ២ និងតូបលក់ដូរចាប់ហ៊ួយចំនួន ២។
សមត្ថកិច្ចបានបញ្ជាក់បន្ថែមថា ក្នុងហេតុការណ៍គ្រោះធម្មជាតិខ្យល់កន្ត្រាក់ខាងលើនេះដែរ ក្រៅពីបំផ្លាញលំនៅដ្ឋានរបស់ប្រជាពលរដ្ឋជាង ៤០ខ្នង គឺមិនបណ្តាលអោយមានប៉ះពាល់គ្រោះថ្នាក់ដល់អាយុជីវិតមនុស្សឬសត្វឡើយ៕
